Ársskýrsla KPMG 2024

Við höfum séð mikla eftirspurn eftir okkar þjónustu undanfarna mánuði, ekki síst í ráðgjöf og skatta- og lögfræðiþjónustu.  Eftir langt tímabil þrálátrar verðbólgu og hárra vaxta þá virðist loks vera viðsnúningur framundan, vaxtalækkunarferli er hafið og verðbólgan hefur rénað umtalsvert.  Það eru því væntingar til þess að aðstæður í atvinnulífinu verði hagfelldar og mikilvægt að ná stöðugleika til lengri tíma.

Á árinu var tekin ákvörðun um að selja meirihluta í KPMG Bókað til norska félagsins ECIT AS og mun nýr eigandi taka við rekstrinum í ársbyrjun 2025.  KPMG mun áfram eiga minnihluta í félaginu og vera í góðu samstarfi við það áfram.  Ekki verða breytingar á þeim öfluga hópi starfsfólk sem hefur leitt og sinnt þjónustu við viðskiptavini á sviði bókhalds- og launaþjónustu.  Þessi breyting er hluti af þeirri vegferð sem KPMG á Íslandi er í varðandi nánara samstarf KPMG á Norðurlöndunum og einnig á alþjóðlega sviðinu.  Stefna KPMG er að efla og sinna áfram þjónustu á kjarnasviðum félagsins sem eru endurskoðun og reikningsskilaþjónusta, skatta- og lögfræðiþjónusta og ráðgjöf.

Eftir stefnumótunarvinnu sem ráðist var í 2022 höfum við unnið saman eftir kjörorðunum „Betri saman“.  Það rammar vel inn styrkleika KPMG sem felst í því að vinna þétt saman þvert á svið, þjónustulínur og landamæri með það að markmiði að veita viðskiptavinum okkar afbragðsþjónustu í samræmi við þeirra þarfir og væntingar. Meginstef stefnunnar okkar eru að stuðla að ánægju starfsfólks, vera augljóst

val viðskiptavina og hafa jákvæð áhrif á samfélagið. Að okkar mati hefur stefnan skilað áþreifanlegum árangri og við vinnum betur en áður saman þvert á félagið, viðskiptavinum okkar og samfélaginu til hagsbóta.

Árið 2025 markar stór tímamót í sögu KPMG á Íslandi en þá fögnum við 50 ára afmæli félagsins.  KPMG hefur verið leiðandi aðili á sínum markaði á Íslandi um langan tíma og við erum afar þakklát fyrir þá tryggð sem viðskiptavinir félagsins hafa sýnt og fyrir það traust sem okkur er sýnt og við eigum allt undir.  Við höfum verið lánsöm með starfsfólk í gegnum tíðina og á því byggjum við okkar árangur, fyrir það erum við ákaflega þakklát. Við horfum spennt til framtíðar á þessum tímamótum og munum sækja enn frekar fram á okkar sérsviðum á grunni þekkingar, reynslu og aukins alþjóðlegs samstarfs.

Við leggjum mikla áherslu á að gefa starfsfólki okkar  tækifæri til að þróa og efla sína hæfni í alþjóðlegu og spennandi umhverfi.  Starfsánægjukannanir sem við framkvæmum reglulega sýna okkur að fólkið okkar er ánægt og líður vel.  Við leggjum áherslu á að styðja við andlega og líkamlega heilsu okkar fólks og bjóðum fjölbreytta ráðgjöf, m.a. í gegnum Köru Velferðartorg ásamt því að halda úti íþróttastarfi sem starfsfólk hefur greiðan aðgang að.  Þá höfum við undanfarin ár fjárfest mikið í aðbúnaði starfsfólks og starfsumhverfi.  Starfsaðstaða okkar á höfuðborgarsvæðinu hefur verið endurhönnuð með það í huga að skapa vinnuumhverfi sem er í fremstu röð á Íslandi.  Nú standa yfir framkvæmdir þar sem verið er að gera slíkt hið sama á starfsstöðvum okkar víða um land. Við erum stöðugt að þróa

og bæta verkferla okkar með stafrænar lausnir í huga.  Jafnframt vinnum við þétt með okkar viðskiptavinum á þeirra stafrænu vegferð og miðlum til þeirra þekkingu okkar og innsæi.

Sjálfbærni er sömuleiðis rauður þráður í stefnu félagsins sem unnið hefur verið eftir frá árinu 2022.  Við höfum byggt upp sterkt sjálfbærniteymi þvert á öll svið félagsins sem styður við okkar viðskiptavini sem og okkur sjálf þegar kemur að því vera í fararbroddi í sjálfbærnimálum.  KPMG hefur verið framarlega í ráðgjafarþjónustu á þessu sviði og fram á veginn mun þurfa að staðfesta og votta sjálfbærniupplýsingar sem fram koma í ársreikningum og öðrum fjárhagsupplýsingum fyrirtækja og stofnanna.

Það eru spennandi tímar framundan og ýmsar áskoranir sem við hjá KPMG hlökkum til að takast á við með okkar starfsfólki, viðskipta-
vinum og öðrum hagaðilum.  Leiðarljós okkar er að skapa áfram traust í viðskiptalífinu með störfum okkar og við tökum þá ábyrgð alvarlega.