KPMG á Íslandi, sem hefur starfað frá árinu 1975, leggur ríka áherslu á jákvæð áhrif á  samfélagið og sjálfbærni í starfsemi sinni. Félagið leggur sitt af mörkum til að skapa virði fyrir viðskiptavini og samfélagið í heild, í samræmi við alþjóðlega stefnu félagsins um ábyrgð og hagsæld.

Við hjá KPMG höfum unnið að því að greina skattspor félagsins síðastliðin ár. Í greiningunni er að finna yfirlit yfir alla greidda skatta félagsins og eru tölurnar í milljónum króna.

Árið 2024 var önnur tvíátta mikilvægisgreining KPMG framkvæmd. Unnið var út frá aðferðafræði KPMG Global við greiningu, áhrifastefna KPMG Global (e. Impact plan) skoðuð og niðurstöður mikilvægisgreininga frá KPMG í Finnlandi, Svíþjóð og Noregi teknar til greina. Fyrirliggjandi gögn voru að lokum aðlöguð starfsemi KPMG á Íslandi. Tvær vinnustofur voru haldnar með starfsfólki KPMG, sem valið var af handahófi, til að greina fjárhagslegt mikilvægi og áhrifamikilvægi, ásamt því að könnun var send út til alls starfsfólks. Svörun úr könnun var 35%. Ein vinnustofa var haldin með framkvæmdastjórn, þar sem meginþungi vinnunnar var á áhrifamikilvægi en einnig var fjallað um virðiskeðju og hagaðila til að undirbyggja hagaðilasamráð. Þörf er á dýpri greiningu á virðiskeðju.

Niðurstöður greiningarinnar sýna fram á að stjórnarhættir og félagslegir þættir vega þyngst, líkt og í mikilvægisgreiningu KPMG árið 2021, þótt ljóst sé að starfsemin geti einnig haft áhrif á sviði hagsældar og umhverfis. Eftirfarandi eru þeir mikilvægisþættir sem teljast mikilvægir í starfsemi KPMG út frá áhrifum, áhættum og tækifærum starfseminnar. Mikilvægisþáttum er ekki raðað í röð eftir mikilvægi:

Markmið KPMG á Íslandi er að veita fyrirtækjum, stofnunum og sveitarfélögum um allt land gæða þjónustu á breiðum grunni.

KPMG veitir þúsundum aðila mikilvæga grunnþjónustu og ráðgjöf á sviði endurskoðunar og reikningsskila, rekstrarráðgjafar, skatta- og lögfræðilegra málefna. Þjónusta okkar er mikilvæg viðskiptavinum okkar til að stunda löglega, og sjálfbæra viðskiptahætti og til að ná árangri í sínu starfi. Stefna KPMG er að hafa jákvæð áhrif á samfélagið og við viljum vera fyrsta val viðskiptavina á markaðnum. Starfsstöðvar KPMG eru 14 talsins og dreifast um allt land.

Hjá KPMG leggjum við ríka áherslu á að miðla þekkingu okkar á mikilvægum þáttum í rekstri fyrirtækja. Á starfsárinu héldum við fjölda funda og viðburða þar sem ýmis viðfangsefni voru til umfjöllunar. Við viljum þakka þeim fjölmörgu sem mættu á viðburðina hjá okkur á árinu. 

Síðastliðin ár höfum við boðið upp á starfsnám fyrir nemendur á háskólastigi. Áhersla hefur verið á nemendur í viðskipta- , verk- og tölvunarfræði. Er það í samræmi við stefnu okkar um að vera eftirsóknarverður vinnustaður og beita áhrifum okkar til góðs. 

Fjölmennar vísindaferðir hafa skapað fastan sess í viðburðardagatali okkar og höfum við boðið háskólanemum í ofangreindum deildum að koma til okkar. Í vísindaferðum kynnum við fyrirtækið en leggjum sérstaka áherslu á vinnustaðinn og innihaldsrík samtöl við nemendur. Árlega höfum við tekið þátt í Framadögum í HR þar sem við heilsum upp á fjölda nemenda og til viðbótar hafa sérstakar heimsóknir staðið þeim nemendum sem eru skráðir í starfsnám til boða þar sem við kynnum bæði fyrirkomulag starfsnáms og svörum spurningum áhugasamra nemenda.

Á árinu hélt KPMG áfram að sýna leiðandi hlutverk í nýtingu gagna og viðskiptagreind með því að þróa golfmælaborð í samstarfi við Golfsamband Íslands (GSÍ). Markmiðið er að hjálpa kylfingum að taka betri ákvarðanir í sínum leik með því að veita innsýn í tölfræðina á bak við Íslandsmótin.

Mælaborðið byggir á greiningu gagna frá mótum GSÍ allt frá árinu 2001 og setur fram mikið magn upplýsinga á einfaldan og sjónrænan hátt. Þar má meðal annars sjá:

• Hvaða holur hafa reynst erfiðastar á Íslandsmótum?
• Hverjir hafa náð besta skori að meðaltali?

Verkefnið endurspeglar metnað KPMG í að veita framúrskarandi þjónustu í gagnagreiningu og viðskiptagreind. Með öflugri gagnatengingu, mælaborðum og sjálfvirkri skýrslugjöf hjálpum við viðskiptavinum að nýta gögn á sem skilvirkastan hátt og skapa virði úr upplýsingum.

Golfmælaborðið er aðeins eitt dæmi um hvernig KPMG nýtir sérhæfða þekkingu í gagnahögun og greiningu til að skapa lausnir sem bæta upplifun og árangur – bæði í íþróttum og í rekstri.

Á árinu hélt KPMG áfram samstarfi við Golfsamband Íslands (GSÍ) og fleiri aðila um Golfdagana, sem eru fjölskylduvænir viðburðir ætlaðir til að kynna golfíþróttina fyrir nýjum kylfingum og styrkja tengsl innan golfhreyfingarinnar.

Golfdagarnir fóru fram á Egilsstöðum, í Stykkishólmi og á Sauðárkróki. Á hverjum viðburði var boðið upp á:

• Kynningu á grunnatriðum golfíþróttarinnar undir leiðsögn PGA golfkennara
• Skemmtilega leiki og fræðslu fyrir alla aldurshópa
• Grillveislu og gjafir fyrir gesti

Mæting var góð og veðrið lék við þátttakendur, sem skapaði frábæra stemningu. Verkefnið hefur heppnast vel og endurspeglar metnað KPMG í að styðja við samfélagið og efla íþróttir sem byggja á jafnræði og inngildingu.